Postby Neg Timid » Wed Jun 01, 2016 4:29 am
Yon mizik pa oblije yon reyalite, mizisyen an ka jis imajine yon istwa ki sonnen bèl, epi li mete l an mizik. Men mizik sa a, « J'ai Brûlé les étapes », se youn nan mizik ki pi reyèl e orijinal ke m tande nan dènye ane ki pase yo. Anpil kritik toujou ap di, Gazzman pa ka delivre pou kò l si se pa charite Arly oubyen Richie fè l. Enben fwa sa-a, pòv la delivre yon megahit pou kò l san ke se pa charite yo fè l. Wi, mwen fout di l menm, mizik sa-a deja yon megahit. E se tout moun deyò a k'ap pale de yon sèl bagay, « Etap...Etap...Etap. » Yon moun gen tout dwa l pou l fè je l chèch, fè figi l byen di, pou l pa fè Gazzman konpliman pou bèl tèks sa-a; men li merite l. Antan yon bon ekriven (mwen ka bay tèt mwen ti kredi a,) Gazzman fè yon bèl gòl avèk kout plim sa-a. E se pa mizik sa-a sèlman, gen omwen 2 lòt bèl gòl ankò sou albòm lan, pou m pa di plis ! Men n'ap swiv reyaksyon piblik la toujou....
Sa k bèl la, sè ke, ou ka tande bri kalòt la ki plake nan figi malonèt yo: plachhhh !!!! Ou ka santi gen anpil moun ki wont. Lè ou mande yo, sa yo panse de albòm Disip la, yo pa ka gade w nan je fiks pou yo reponn; yo tèt bese avèk je yo touwouj tankou zonbi. Paske eko albòm lan tèlman rezone fò deyò a, ti pale anpil y'ap fè pou fè wont sèvi kòlè, vin manke repondong pou kontrekare...
Kòm gen anpil lòt albòm ki gen pou sòti pou ane 2016 la, nou poko ka kouri ap panse sou mizik de lane. Kidonk, nou oblije rete tann lòt albòm yo sòti. Men pou mwen, se yon mizik ki deja klase pou l mèyè mizik pou ane 2016 La. Mwen dakò avèk Ernst.
Nèg Timid
(Ti Cherif Trankil la)
Facebook/: Les Jean-Philippe
