Postby Mizikamort » Sun Oct 02, 2016 10:17 am
Wi pwoblèm nan la. Li pa menm jan an, men toujou gen moun ak ti mantalite sa a.
Se pa koulè ki fè kèk djaz monte sèlman men osi mwayen ekonomik yo ak zanmitay yo. E kòm ase souvan nan peyi nou koulè prèske egal lajan, sa te vin kreye on sòt de avantaj pou djaz ti mesye grimo yo. Yo te plis ka kenbe on djaz pou lontan jiskaske li eklate paske anpil ladan yo t'ap fè mizik pou plezi tou menm si yo pa rive lwen ak djaz la.
Nan fen ane 90 yo ti djaz t'ap boujonnen nan tout peyi a, djaz Konpa k'on djaz rasin. Nan zòn Kafou te chaje yo, soti sou Zanmann nan Lamentin, Rev dèyè basen, nan Cote Plage 22 te gen ti djaz ni nan mitan riyèl la ni nan tèt riyèl la. Defen Jean Robert pat janm pa gen djaz. Youn nan ti djaz Kafou yo pa rive apa de Rev ki fè non li nan kanaval. Anba lavil menm menm se pa pale. Jiskaske nou vin rete Didi Djakout ak Frero Zenglen ki te sot nan Imaj Konpa. Legend te fè non li tou men plis nan kanaval.
Tout ti djaz Kafou ak anba lavil yo pat rive, men se pat akoz de koulè. Se te pito akoz de mwayen ekonomik yo avèk zanmitay (antouraj) yo. Mwayen ekonomik paske mesye yo te renmen mizik men yo pat gen lajan pou fè mizik. Aprè repetisyon menm kòb machin yo konn pa ka bay mizisyen. Antouraj paske zanmi yo pat gen lajan pou al sipòte yo lè yo resi fè on ti bal, tout zanmi vle antre gratis.
Nan ti mesye piwo yo, yo te chaje ti djaz tou. Men pifò ladan yo se te pou plezi byen ke te kòmanse gen ti polemik antre yo san yo pot ko menm rive. Yo te gen kèk ti mesye po klè, mwen di kèk pa tout. Anpil nan ti mesye sa yo te gen ti mwayen pou woule on ti machin oubyen jwenn on woulib nan men on zanmi pou yo al nan repetisyon. Mizik te plis on plezi olye de on mwayen pou rive. Pifò ladan yo te frekante menm kalite lekòl, yo te chaje ak bèl ti zanmi fi nan tout lekòl kay mè yo. Kidonk yo te gen on antouraj ki te ka sipòte yo lè yo ap pèfome. Genyen nan ti djaz sa yo tankou 2nice ki te pou ti mesye Graham yo mwen kwè ki te menm konn vwayaje nan antiy al jwe san albòm, gwo koze. Pifò ti djaz sa yo te ka pèmèt tèt yo on mizik ak tout videyo. Jèn nan epòk sa ka sonje: 2nice, Top Digital de To Ansito, Coktail de Reginald Bastien alyas Ti Regi, Konpa Kreyol, e latriye.
Antouraj ak mwayen ekonomik nan mitan djaz Kafou, anba lavil, e ti mesye piwo yo se diferans ki vin plis ranfòse vye kwayans sa ke si on djaz pa gen grimo li pap mache a. M'ap repete li ankò, djaz Kafou ak anba lavil yo pa pran paske yo pa gen lajan pou te kenbe djaz an fonksyon e yo pat gen zanmi ak mwayen ekonomik pou al sipòte yo jiskaske yo te ka kreye on baz ki te fò. Nan epòk sa djaz ki te ka reziste yo pifò te gen grimo.
Sa se opinyon pa mwen.
Zenglen...n'ap toujou alèz.
